marriage in banjara। happy marriage tips in banjara

 vaya( वाया ) -Marriage in banjara 

             In this article you will know what is the meaning of marriage, what should age of marriage, what is necessary for happy married life in banjara language.

vaya - marriage in banjara

     वाया प्रतेक जीवणेर एक भाग छ. 

छोरा-छोरी नाणक्यार मोटे हेते जावच, शाळा म जावच कॉलेजम जावच, डिग्री हेर बाद जॉब करच, बिझनेस करच अन बादेम वाया करच,काई जाग काई तांडेम छोरा क छोरी क १२ वी लंग सिकच अन छोरा खेती लार लागच कोई १२ वी बाद कति काम धंदो करच अन वाया करलच. 

कोई करा तो कोई करा वाया जवळपास सारी हेन  करच. 

 पण वाया र खरी वय काई छ?

काई वाया पुरता फक्त कमानू  गरजेर छ?

       घणे वाया आसे छ जे २ -३ सालेमाई तूट जावच. घणे वाया आसे छ जे टकच पण नामे पुरता, जेन फॉरमॅलिटी लाइफ कच (चालू छ करन चालू छ कच ). 

       शिक्षण (Education )एक आस चीज छ जेर मूळ घणी गोस्टीर फायदो होच.छोरा किंवा छोरी जन १२ वी र आंग कॉलेजेम जावच तो ओ फक्त डिग्री लेणी तो डिग्री सोबत ओ ३-४ वरसेम घणी वाते सिकच. जसो दुनियादारी, केती कसो वागेरो कसो बोलेरो, काई बोलेरो, केण माण देरो कुकर देरो, कायदा-कानून,श्रद्धा-अंधश्रद्धा काई छ, केर सामलेरो केर कोणी आसि वाते भी सिकच. छोरा छोरीण  मान सन्मान देणू सिकच,छोरी सिकी कि आंगेर पिढी भी सिकच.अन महतवेर मंजे maturity वाडच. 

    

            

         वाया पुरता घनो इम्पॉर्टंट छ जको maturity छ. जर छोरी जॉब कीदी तो वर maturity आजी वाडच. घरेम पिसा भी जास्त आवाच अन कोई कोई छोरी फालतूर खर्च करच कच उभि कम हीय.कुनसी वातेप लडेर, कुनसी वातेप शांत रेर ई maturity मूळ कळच.

      वायार बाद जे वाद विवाद होच वर करन मंजे  

      १) maturuty कमी रेणु 

      २) स्वत: ण पार्टनर पेक्षा भारी समजणू,जास्त मनच समजच, वन  कलेणी हाणू समजणू. 

      ३) एकमेकेन समजण ण लेणू 

      ४) एकमेकेन वेळ ण देणू.

         

•    आचे नाते (relation) पुरता, वाया सेवटेलंग टके पुरता ये वाते जरूरी छ. 

    १) पार्टनरेन समजण लेणू वर भावना ,पसंद-नापसंद समजणू गरगेर छ. 

    २) एकमेकेर respect करनू गरजेर छ.  

  ३) जर लडाई हेगी तो तिसरे मनकयान / बाईण माई ण लाता एकमेकेती बोलेरो,केर काई चुको ऊ देकेरो, वोपेर बोलेरो (discuss  करेरो) जर बोलणू जमरो कोणी हीय,ईगो माई आरो हीय तो एक कागदेप लकण नतर whatsapp  पे प लकण दुसरें देरो (पार्टणरेण ),शांत मनेती विचार करेरो अन प्रॉब्लेम solve करेरो. 

   ४) नातेम घमंड आवगो कि दुरावा वाडतो चालच वर मूळ नातेम घमंड न चाय. 

       वाया करेर योग्य वय केतो- देको छोरीन शिक्षण पूर्ण करेन २१-२२ साल वय हेजावच, तो छोरी पुरता वाया र वय २२-२४ साल रिचाय. वतलंग छोरी mentally वाया पुरता तयार हेजावच.आब तो सरकार भी वाया र वय १८ परती २१ करदिनो.

            छोरा ण भी डिग्री पूर्ण करेन २१-२२ साल लागच, पण वन आंग जॉब देकनू पडच compulsory. वर मूळ वन सेट्टल हेन टेम लागच,तो छोरार वायार वय २५-२७ साल रिचाय.

 

     अन छोरार अन छोरीर वयम फरक ५-६ साल रिय तो आचो. मंजे छोरी जास्तीत जास्त ५-६ साल हालक चाय,बादेम काई होच छोरा बॉस अन छोरी एम्पलॉय आसो नातो होच मंजे सारी निर्णय छोराच लिय छोरीण कलेणी ऊ हालक छ हाणू हेजावच.छोरा -छोरी र समानता (equality) रिचाय. जास्त गॅप मूळ एक generation gap आवगो आसो वाटच,समजा फरक १० सालेर छ तो दोइर पसंद-नापसंद आलक आलक रिय,समजा छोरार डिग्री हेमेलीच अन छोरीर १० वी तो वनूर विचारेम कत्रा फरक रच ई आजू बाजू देकसकोचो.

          तम जर हीरो -हिरोणी सोबत compare करितो वाटीय काई हेणी पण वनूर lifestyle अन आपळ lifestyle वेगळी छ. अन वनूर वाया कत्रा दनेलंग टकच, वणून घडी घडी वाया करेन काई वाटेनि. 

         आपण एकदा वाया हेगो कि दुसरो वाया र विचार कराणी. जर मनेसारिक छोरा - छोरी न  मळी तो रोताळीन, नसीबेन कोसताळीन,दुसरेण कोसताळीन,adjust  करचा. अन जेरजेर कर्तव्य पार पाडाचा. पण ऊ नातो फक्त नामेपूर्ता रेजावच, दुसरे जत्रा खुश रच वतरा वो रेनी. याडी-बापे समोर खुश छा दकाळच पण मायती आतर रेनि. जास्त करन छोरीर स्वप्न आधुरे रेजावच. आभभी घने लोक छोरीण पसंद ना पसंद पुचेणी.

  छोरी / छोरा न देकेण जाय पुरता कुलसी वाते महत्वेर छ. 

      १) छोरी दकायेण कतरी सुंदर छ येर पेक्षा स्वभाव कसो छ ई  देकेरो.ऊ सारिन लेन चालेवाली छ काई देकेरो। 

      २) छोरीर शिक्षण देकेरो कारण शिक्षण घनो काम आवाच. 

      ३) छोरार स्वभाव देकेरो, वाईट वेसण छ काई देकेरो. कारण दारू  मुळ घणे घर बरबाद हेमेलेच. 

     ४) छोरार शिक्षण देकेरो अन छोरार कमाई भी देकनू गरजेर छ. 

     ५) जर छोरी -छोरा दोइ कमारे हीय तो आजी आयचो.

Read More: सेवालाल महाराज हिस्ट्री

 

                                    Hum banjara song lyric